શબ્દાંકન - રિદ્ધિ પટેલ ©

એ ચહેરાની સાદગીમાં શું ખોટ હતી કે,

આપણે મેકઅપથી પોતાની જાતને જ ઠગતા થયાં?

એ જીવંત હસતાં માનવીમાં શું ખોટ હતી કે,

આપણે ફેસબુકની શુષ્ક મિત્રતા માટે ચિંતાતૂર થયાં?

એ સંબંધોની લાગણીઓમાં શું ખોટ હતી કે,

આપણે ટીકટોક પર વ્યર્થ અભિવ્યક્તિ કરતાં થયાં?

એ ગામના ચોરે થતી વાતોમાં શું ખોટ હતી કે,

આપણે કોફી શોપના ઘોંઘાટમાં ભ્રમિત થયાં?

એ લીલા ખેતરોના સૌંદર્યમાં શું ખોટ હતી કે,

આપણે કોંક્રિટના જંગલોની જાહોજલાલીમાં ગુમ થયાં?

એ દરિયાની ખારાશમાં શું ખોટ હતી કે,

આપણે ક્લોરિન વાળા સ્વિમિંગ પૂલમાં ડૂબી ગયાં?

એ વડના છાંયડે મળતી ટાઢકમાં શું ખોટ હતી કે,

આપણે એ.સી. રૂમના બંધનમાં કેદ થયાં?

એ ગામડાંની તાજી હવામાં શું ખોટ હતી કે,

આપણે પેટ્રોલના ધુમાડાં ફેફસામાં ભરતા થયાં?

એ સ્વયંની ખોજમાં મળતા સુખમાં શું ખોટ હતી કે,

આપણે ભૌતિક સુખના મોહથી છળી ગયા?