काव्यकन्या
" काव्यकन्या "
फडताळ उघडता कवितांचे
दृष्टी आठवांनी गहिवरलेली,
पाहून त्यांच्या विविध मुद्रा
विस्मयाने होती बावरलेली ।
एक राज्ञीसम, दिवाळी अंकी
प्रथम पृष्ठावर विराजलेली,
एक साहित्य संमेलनातील
रसिकजनांनी वाखाणलेली ।
एक दुर्लक्षित राहिली म्हणूनी
फुरंगटून कोपऱ्यात बसलेली,
एक थबकली, अर्ध्या मार्गी
लिहिता- लिहिता फसलेली ।
एक भावना प्रवाही वाहता
आसवांनी अक्षरे मिटवलेली,
एक साभार परतीच्या घावाची
कट्यार काळजा पचवलेली ।
एक सुकल्या गुलाबाच्या
स्मृतीने अंकीत झालेली
एक पहिल्या प्रणयगीताची
चिंच जशी गाभुळलेली ।
एक कधीssची लिहिलेली
पिवळ्या पानी विसावलेली,
एक हसरी, दुसरी रडवेली
समान कळांनी प्रसवलेली ।
एक गुपित वदते, हसू नका
सहोदरा तव येऊ घातलेली,
गर्भी मम पुन्हा वाढत आहे
जरी केसात चांदी पिकलेली ।
© सौ. जया गाडगे, इंदूर.
