કુદરત
એ કુદરત કેટલી સુંદર હશે?
એ કેવી રાત હશે જ્યારે સૂરજને ક્ષિતિજમા ડુબાળી
ચાંદો એની ચાંદની નિખારતો હશે.
એ કેવું દ્રશ્ય હશે જ્યારે સવારનું પહેલું કિરણ
ઘોર રાતને અલવિદા કરતું હશે.
એ ફૂલોને પણ ગમતું હશે,
જ્યારે એક પતંગિયું એને ચુંબતું હશે.
એ કાંટાળી બોરડી પણ અંદરથી રડતી હશે,
જ્યારે એક વેલ એના તરફ વળતી હશે.
એ પર્વત પણ હૈયેથી પીગળતો હશે,
જ્યારે એક વાદળી એના પર વરસતી હશે.
એ પથ્થર કેવો હરખાતો હશે,
જ્યારે એ મૂર્તિ ના ઘાટમા ઘડાતો હશે.
એ નદીનું નીર કેવું આતુર હશે,
જ્યારે એ સાગરના સાથમા સમાતુ હશે.
એ પક્ષી કેવુ પ્રસન્ન હશે,
જ્યારે એના માળામાં કલરવ સાંભળતું હશે.
એ સ્થિતિ કેવી હશે જ્યારે, રણની રેતીને
પવનનો સ્પર્શ પ્રેમથી પંપાળતો હશે.
એતો કેવો પ્રેમ હશે જ્યારે, એક ઝાકળની બુંદ ને
પુષ્પની પાંખડી ઝીલતી હશે.
જો આ ક્ષણો આટલી સુંદર હશે,
તો એને બનાવનાર એ કુદરત...
એ કુદરત કેટલી સુંદર હશે?
ડો. અંકુર બેરા