મખમલી બિછાને
નથી ઊંઘ આવતી મને આ મખમલી બિછાને,
પથ્થરે સુવા ટેવાયેલો એવો અલગારી છું...
રાહ જોઈ જોઈ ને થાક્યો આ મખમલી બિછાને,
નિંદ્રાદેવી છે રિસાયેલ એવો અભાગી છું...
ટક ટકના અવાજને તાકતો બેઠો મખમલી બિછાને,
ઘડિયાળમાં વહેતો સમય રોકવાને અસમર્થ છું...
પડખા ફેરવતો હું આમતેમ આ મખમલી બિછાને,
વાટ નિરખતો વિસામાની,એવો પથિક છું...
પ્રહર વીત્યા ત્રણ, છતાં જાગતો હું મખમલી બિછાને,
કુદરતના એ સુખથી વંચિત, કેવો કમનસીબ છું...
તજી દીધી સહુ આશ આખરે મખમલી બિછાને,
પોઢયો સુખેથી ભોંય પર, એવો વૈરાગી છું...
નથી સમજાતું, શા કાજે મોહે સહુ મખમલી બિછાને,
ધરણીની ગોદમાં જ રહેતો જીવ હું મસ્ત છું...
નથી ઊંઘ આવતી મને આ મખમલી બિછાને,
પથ્થરે સુવા ટેવાયેલો એવો અલગારી છું...
- ભાવિક પ્રજાપતિ
Like
