એ રક્ષાબંધન !
ભાઈ ,
તને યાદ છે ?
એ રક્ષાબંધન !
રાખડીની પસંદગી માટે
તારી ધમાલ.
તું કહેતો,
હું કહું તે જ લેવાની ,
અને
હું ડીંગો બતાવતી .
બા બિચારી મુઝાતી !
કેટલી મોંઘી !
આખરે જીદ આગળ નમી જતી.
આપણામાં સમાજ ક્યાં હતી !
આપણે પૈસા લઈને,
ખિલ ખિલ કરતાં દોડી જતાં .
આપણે તો આપણામાં જ મસ્ત .
એની આંખોમાં આશીર્વાદનો ,
ધોધ છ્લકાતો .
આપણે ક્યાં એ બધુ જોતાં !
બા પાલવના છેડાની ગાંઠે બાંધેલો સિક્કો ,
મને આપવા તને આપતી .
તે રૂપિયો હું સાચવતી .
પછી તો આપણે .....
મો...ટા થઈ ગયા .
મસ મોટી ગિફ્ટ !
પણ ....હજુ ક્યારેક પેલો સિક્કો...!
-ગીતા શુક્લ