કાનજી
છંદ - બસીત
બંધારણ- ગાગાલગા ગાલગા ગાગાલગા ગાલગા
શીર્ષક : કાનજી
નાચો તમે આંગણે, વાંધો જરા પણ નથી;
ગાઓ તમે બારણે, વાંધો જરા પણ નથી.
ઝૂલાવું આ અંતરે, માતા બની કાનજી ;
ઝૂલો તમે પારણે, વાંધો જરા પણ નથી.
નિર્મળ હ્રદય તો, સદા છે પ્રેમમાં કાનજી ;
બાંધો તમે તાંતણે, વાંધો જરા પણ નથી.
આકાશ સમ પ્રેમમાં, વિરાટ છો કાનજી ;
છોડો આ બંધારણે, વાંધો જરા પણ નથી.
તમને વિસારૂ હું ના, પણ જો તમે કાનજી ;
ભૂલો કશા કારણે, વાંધો જરા પણ નથી.
બોલાવશો પાસ, એ આશા ઉરે કાનજી ;
ઝીલો તમે પાંપણે, વાંધો જરા પણ નથી.
વંદન "અમી-પ્રીત"નાં, સ્વીકારજો કાનજી ;
આવો આ સમરાંગણે, વાંધો જરા પણ નથી.
✍️ પ્રીતિ શાહ ("અમી-પ્રીત")