સાજનની વાટે
કોરુંધાકોર હૈયું સજીને બેઠી હું બારીએ,
સાજનની વાટે મટકું પણ ન મારીએ...!
જોયું'તું સપનું આંખની અટારીએ,
ઝલક પામવા પિયુનું હૈયું હારીએ...!
પૂર્યા'તા રંગ મહીં હૃદય પીંછીએ,
ચટકો ભર્યો છે વિરહના વીંછીએ...!
ઉગાડ્યું'તું ફૂલ વાછંટથી મનડાએ,
સુગંધ પ્રસરાવી મારા આ તનડાએ...!
આશ માણવાની રંગત સેજધારે,
ભીંજાવું છે તારી બાંહોમાં બહારે...!
હું વહેતી શાંત નદી ને તું ઘૂઘવતો દરિયો,
મેં તો તનમનમાં તને ઠાંસી ઠાંસીને ભરીયો..!
-વર્ષા કુકડીયા 'મુસ્કાન'
