કેટલાક હાઇકુ
હાઇકુ
*
સૂર્ય વગર
અંધારની ઉજાણી
વૃધ્ધ નયન.
*
પવનવેગે
મિથ્યા દોડ્યા કરતો
વૃધ્ધ તોખાર.
*
ગોરી હથેળી
ખરબચડી ભીંત
વ્હાલ વરસે.
*
બારણું ખૂલ્યું
ઉંબરો ઓળંગતું
નાજુક સ્મિત.
*
ખરતો તારો
આકાશ ઝળહળ
શાશ્વત સુખ .
*
સાવ નિર્જન
ઘરની બારસાખ
લીલું તોરણ.
*
ટૂંટીયું વાળી
આખું નગર માણે
ગાઢ નિંદર.
*
રજાઇ ઓઢી
બે હૈયા ધક ધક
શિયાળુ રાત.
*
ગામ પ્રવેશું
વ્હાલ વરસાવતું
ખેતર બાઝે.
*
ઉંબરે આવી
'હું તમારું તોરણ'
ચીં ચીં ચકલી.
*
સાંજનો ખૂણો
વરસાદ વગર
કોરોધાકોર.
*
નિર્જનપથ
યુગોથી ચાલ્યા કરે
એકલપંડે .
*
હાંફતા ફરે
સાત સફેદ ઘોડા
છબીમાં કેદ.
*
પોષી પૂનમ
વગડો ગાંડોતૂર
ચાંદની કાજે.
*
આકાશી વીજ
સુખનું સરનામું
ક્ષણ પૂરતું.
*
પૂનમ રાત
ચાંદનીમાં નહાય
આખો વગડો.
*
રસ્તાઓ કાપી
ઘર પહોંચ્યા , ગામ
જાકારો દેતું.
*
બે ટંક, પેટ
માટે વેઠ, ભટકે
લાચાર લાશ.
*
હદય બાળી
માનવી ભટકતો
વતન પ્રેમ.
*
લીલેરું ધાસ
માદક વરસાદ
યુગલ મૌન .
*
ધાન સળગે
આગ વિહોણા ચૂલે
હાંડલી ભૂખી.
*
આવકારો દે
વિશ્વાસુ દરવાજો
ધાડપાડુને .
*
માસ્ક લગાવી
માણસાઇ હણાઇ
માનવ શૂન્ય.
*
ચંદ્ર ઉજાસે
ઘનઘોર દીસતી
પૂનમ રાત.
*
રાત-દિવસ
દિશાઓ ગભરાય
લોક ડાઉન.
*
હૃદય પાર
બાણશૈયા વીંધાઈ
ભીષ્મ મરણ.
*
કુહાડી વીંઝે
કઠિયારો,જંગલ
આખું અવાક્.
*
સજળ આંખ
ટોપલો ભરી બોજ
વતન વાટ.
*
સૂર્ય કિરણ
જળ છેદી ઉતરે
લીલ હૃદયે.
*
રડતી આંખે
દિવસભર ચાલે
મૌન સંવાદ.
*
અડધી રાતે
ઝબકીને જાગતા
ઘરડા સ્વપ્નો.
*
શિશુ વિહોણી
વડવાઈ ઝૂલતી
ઝાડ થી ઝાડ.
*
વૃક્ષ હેઠળ
ચર્ચા થઈ રહી છે
બુઢ્ઢા પર્ણો ની.
*
તડકો હાંફે
કાળઝાળ ગરમી
છાંયડા વિના.
*
કાળી ભમ્મર
રાત, ફગફગતું
ફાનસ રૂએ.
*
વૃધ્ધ સાંભળે
ચુપકીદી વનની
વિના કારણ.
@ ગુરુદેવ પ્રજાપતિ ' ફોરમ '
રામજી મંદિરની બાજુમાં,
જૂના બજાર - કરજણ
મુ.પો.તા. - કરજણ
જી. - વડોદરા ( ગુજરાત )
પિન. - 391240
મો. - 9426779593
ઇ મેઇલ - poetguru84@gmail.com