વરસાદી ઝરમર
વરસાદ એટલે મારા વરનો સાદ,
મને રહી રહીને આવે છે તમારી જ યાદ !
કરું છું તમને એક જ ફરિયાદ,
જીવ ઝંખે છે તો ફક્ત મારા 'પ્રિય'નો સાથ.
સુખ દુઃખનાં ગુણાકાર ભાગાકાર કરીને કરીશું એક એક મુશ્કેલીઓ બાદ,
ચાહું છું તો બસ જીવનભર તમારો સંગાથ.
ઝૂમીને આ મૌસમમાં રાખવો છે તમારા હાથમાં હાથ,
તમે નથી અહીં એનો જ તો છે આ વિષાદ.
ભલે ને છે આકાશમાં આજે છે અમાસ,
મને આખા બ્રહ્માંડમાં તમે જ દેખાઓ છો મારા ચાંદ.
પ્રેમનો રંગ પૂરીને શરુ કરીએ આપણી અનોખી શરૂઆત,
નાની આપણી આ દુનિયા આવો કરીએ આબાદ !
જયારે જળબિંદુઓ રચી રહ્યા છે આ નવો સંવાદ,
કર્ણપટલે અથડાય છે લાગણીનાં સ્વરોનો નાદ.
મોર ટહુકી ટહુકીને કરે છે ચાહતનો સાદ,
તો કેમ ના જાગે હૃદયમાં અઢી અક્ષરનો ઝંઝાવાત ?
આ છે તમારો ને મારો વરસાદ,
આપણો વરસાદ, મારા વરનો સાદ.
- ભક્તિ શાહ