એમ થાય આ ચોમાસે એવું કરું...
એમ થાય આ ચોમાસે એવું કરું!
સોશ્યિલ ડિસ્ટન્સ પર રહેલા ,
વાદળાને બાથમાં ભરું !
ઓલી વેક્સીનેટેડ વીજળીને,
લૉકડાઉન ગજાવવા નોતરું
એમ થાય આ ચોમાસે એવું કરું!
આ વરસે, કેટલીય પાંપણેથી ખર્યા આંસુડાને,
છીપલામાં સંતાડી, મોતી કરું!
હોય જો કયાંક બચપણ નોધારું,
એની નાવડીને સરકવા પાણી ભરું !
...એમ થાય આ ચોમાસે એવું કરું!
બેરંગ થયેલ પાલવના છેડે,
મેઘધનુષની રંગોળી ચીતરું!
સૂના કોઈ હૈયાની પાંગતે બેસીને,
થનગનતા મોરલાનાં ટહુકા ધરું!
...એમ થાય આ ચોમાસે એવું કરું!
ખખડેલી કાયાનાં બુજાયેલ કોડિયામાં,
વહાલપની વીજળીનો ઝબકારો કરું
પાન ને પાંખના ટેરવેથી સરકીને
તૃષાર્ત કણ કણમાં લીલપ ભરું !
...એમ થાય આ ચોમાસે એવું કરું!
કહીદો ઓલ્યા મેહુલાને વાંછટ નહીં ચાલે આ વખતે,
વરસાવવું પડશે વહાલ અદકેરું !
વેદનાની વાદળીમાં હાસ્યનું જળ ભરું
આંસુ સ્મિતનો હિસાબ એમ સરભર કરું !
...એમ થાય આ ચોમાસે એવું કરું!
એમ થાય આ ચોમાસે એવું કરું!