याला जीवन ऐसे नाव
सर्वांवरती प्रेम असावे
मनी नसावा दुजाभाव
सर्वांसाठी जगत रहावे
याला जीवन ऐसे नाव ॥
मंदिर मस्जिद जरी वेगळे
देव तयातील एक आहे
नमाज नमस्कार जरी वेगळे
भाव तयातील एक आहे
ईश्वर अल्ला दोन्ही एकच
जरी वेगळे नाव ॥
झेंडे पताका जरी वेगळे
ध्येय तयातील एक आहे
नाव गाव जरी वेगळे
प्रेम तयातील एक आहे
माणुसकीचा पान्हा फुटावा
असा असावा भक्तिभाव ॥
तलवार सत्तूर जरी वेगळे
धार तयातील एक आहे
चालवणारा जरी वेगळा
वार तयातील एक आहे
सारा मानव एकच असता
का घालावा घाव ॥
भाषा प्रांत जरी वेगळे
श्वास तयातील एक आहे
जाती धर्म जरी वेगळे
विश्वास तयातील एक आहे
काळे गोरे एकच असता
का पाळावा भेदभाव ॥
सर्वांवरती प्रेम असावे
मनी नसावा दुजाभाव
माणुसकीला फासेल काळीमा
असा नसावा वैरभाव
सर्वांसाठी जगत राहावे
याला जीवन ऐसे नाव ।।
श्री. संदिप पंडित सोमेश्वर
९६५७८२८६८७
