अभंग
पंढरी निवासी | सखा पांडुरंग |
त्याचेच अभंग | गातो मीही ||१||
देहू, आळंदीची | ही आषाढवारी |
जगाचा कैवारी | विटेवरी ||२||
कोरानाची साथ | मंदीरही बंद |
मनाचा आनंद | हिरावला ||३||
जाहले दर्शन | वैद्य ,पोलीसात |
बँकेच्या लोकात | विठू दिसे ||४||
चंद्रभागा तीर | झाला सुनासुना |
पंढरीचा राणा | एकलाच ||५||
गुलाल ना बुक्का | टाळ ना मृदंग |
वारीत ना दंग | वारकरी ||६ ||
माऊली भेटीची | लागे मनी आस |
विठ्ठलाचा ध्यास | मनामाझी || ७ ||
भक्तीचा हा भाव | मनात असावा |
विठू हा दिसावा | घरी मज ||८ ||
आता तरी देवा | मंदीरे खुलावी |
मुर्ती ही दिसावी | सावळ्याची || ९ ||
तुझ्या आठवात | कंठ हा दाटला |
विठू मी शोधला | माणसात || १० ||
सौ.अलका माईणकर
अकोला
