કૃષ્ણપ્રેમ
હે ક્રિષ્ણા,
તને પામવાની જ છે તૃષ્ણા,
જન્મોજન્મની મનની એકમાત્ર એષણા,
કૃષ્ણમય થઇ જીવતર નીકળે ઘણાં ઘણાં.
બંધાયેલી છું તારી સાથે પ્રત્યેક તાંતણે,
મને બસ મનમોહન તું જ જાણે,
ન ફક્ત એકટાણે,
શ્રી હરિ શ્રી હરિ જપું નિરંતર જાણે અજાણે.
જરા,વ્યાધિ, મોહ ને માયા,
આખરે તો એકાકાર થવું છે ત્યજી ને આ કાયા,
કેવી છે આ વેદના, કોણ સમજે તારા વિના ઓ માધવા,
મોક્ષ દઈ મુક્તિ અપાવને જાદવા !
કૃષ્ણ થકી શ્વાસને મળે છે જીવવાની પ્રેરણા,
કુંજ બિહારી સંગ જોડાયેલાં રહે પ્રીતનાં તાંતણાં,
હૈયાનાં પારણાંમાં ઝૂલો સદૈવ નંદલાલ,
ને લઉં લાખ લાખ ઓવારણાં !
મોરપીંછ સમાં જીવનનાં આ ભિન્ન ભિન્ન રંગ,
સહનશક્તિ તું જ આપે મારા અનંત,
પળ પળ ફૂટતાં રહે મુજ મહીં "કૃષ્ણભક્તિ"નાં ઝરણાં,
શ્યામ નામ વિના નહિ જડે ક્યાંય આ જીવને ઠેકાણાં !
ક્ષમા કરજે મુરલીધર જો થાઉં તારાથી વિભ્રંશ,
છું તારો જ ને તારામાં જ સમાશે અંતે તારો આ અંશ,
કરું છું ગિરિધર તમને હું એ જ મનામણાં,
અવિનાશી પરબ્રહ્મ સિવાય ન થાય મને અન્ય કોઈ પણ ભ્રમણા,
અખંડ સત્ય ફક્ત હરે કૃષ્ણ, હરે કૃષ્ણ !!!