પૂનમનો ચાંદ...
હૃદયના ઘાવ ધુઓ છો; તમો મારા જ લાગો છો,
મારી આંખ ઠારો છો; તમો સાચે જ લાગો છો.
નથી ભીતરે ભૂખ કે તરસ; નથી હૈયે બેચેની કે ઉજાગરા,
નથી કાલની ચિંતા; નથી ઉથલ પાથલ કે ધજાગરા.
તમો સડસડાટ દોડો છો; તમો મારા જ લાગો છો,
તમો હૈયું નીચોવો છો; તમો નિર્મળ લાગો છો.
નથી પરાયા કે અતડા; નથી આગંતુક કે મહેમાન,
નથી મનમાં દ્વેષ કે પ્રપંચ; નથી દિલમાં ફરમાન.
તમો ઓરતા ભૂલાવો છો; તમો મારા જ લાગો છો,
તમો ઉદધિ ઉછાળો છો; પૂનમનો ચાંદ લાગો છો!
- તા. ૦૮/૦૧/૨૦૨૨
- પરથીભાઈ ચૌધરી,"રાજ"