चैत्राची चाहूल
चैत्राची चाहूल
आला आला चैत्रमास, उभारून गुढ्या तोरणे खास
सकलजन झाले सज्ज, नववर्षाच्या स्वागतास
आला आला चैत्रमास, घेऊनी फुलांची ग रास
भिडला सुगंध गगनास, सुंदर साजिरा मधुमास
कोकिळेचे मधुर कूजन,सवे वायूचे गुंजन
मधुरसाचे ग सेवन,करिती भ्रमर आनंदून
दारा बांधले तोरण,रेखिले अंगणी चैत्रांगण
चैत्रगौरीचे ग पूजन,होई घराघरांतून
फुलाफुलांची आरास, उदबत्तीचा ग सुवास
नैवेद्या भोजन सुग्रास, चैत्रगौरी साठी खास
भगिनीवर्गाची लगबग,देण्या हळदी कुंकवाचे आमंत्रण
या ग या सख्यांनो,करू गौरी सोहळा आपण
हळदी कुंकवाचा ग सोहळा, भगिनी झाल्या ग गोळा
आंब्याच्या डाळीसोबत, आनंद पन्ह्याचा घ्यावा
वृक्षवेलीस ग येई, मोहोर पाचूच्या पानांचा
होई उत्सव साजरा, वसंताच्या आगमनाचा
आसमंती बहरे वसंत,होई हर्ष हृदयस्थ
चैत्र महिन्याचे गीत,होई होई हे कंठस्थ
©️®️ ऋजुता देशमुख