વલખતું સત્ય..!
બાળકોની બધી જ ઈચ્છા પૂરી કરી
પોતે સાદું સીધું શર્ટ પહેરી,
એક પિતા પોતાની ભીની ખુશીને
એમ જ બસ ક્ષણમાં
એપ્રિલ ફૂલ બનાવે છે..!
આખો દિવસ કામ કરી થાકેલી માતા
મધરાત્રે પણ બાળકની મનપસંદ વાનગી,
હસતે મોઢે બનાવી પોતાનાં અનાડી થાકને
એમ જ બસ ચૂટકીમાં
એપ્રિલ ફૂલ બનાવે છે..!
મેણાં ટોણાં સાંભળીને દુઃખમાં
જીવન વ્યતીત કરતી એક દિકરી,
પિયરનું સંભારણું આવતાં જ
પોતાનાં સૂકાં આંસુઓને
એમ જ બસ પળમાં
એપ્રિલ ફૂલ બનાવે છે..!
લાગણીઓનાં સાગરમાં વહી
હિલોળા લેતી પ્રીતમાં..
જવાબદારીઓ વચ્ચે ખોવાઈ જતાં
પતિ પત્નીની બદમાશ ખામોશીને,
ઉદાસ થતું સૂનું અંતર
એમ જ બસ પલમાં
એપ્રિલ ફૂલ બનાવે છે..!
ICU માં વેન્ટીલેટરની ટીક ટીક સાથે
જીવનમાં પરત ફરવાની એક જીવની જીદને,
સામે હસી રહેલું બેતાબ મૃત્યુ
એમ જ બસ પલકવારમાં
એપ્રિલ ફૂલ બનાવે છે..!
હું પણ આજે એપ્રિલ ફૂલ બની ગઈ
હા એમ જ,
રોજની જેમ જ
અનાયાસે નહીં કદાચ
જાણીને જ..
શમણામાં વિહરતી
સ્નેહનાં ઝૂલે ઝૂલતી
ફૂલોની સૈયા પર મહેંકતી
તરસતી આંખે ભીંજાતા હૃદયે
હા હું એપ્રિલ ફૂલ બની જ ગઈ..!
જયશ્રી બોરીચા વાજા
'લાવણ્યા'