पाऊस
पाऊस
धरेवरी सुगंधाचे
सुरू जाहले सोहळे
अवकाशी लगबग
मेघ करीती सावळे
झरझर येती धारा
जांभुळले नभांगण
सजविती धरणीस
वरुणाचे सारे गण
रिमझिम बरसत
धारा आल्या कोसळत
सरीवर सरी येती
हुंदडत बागडत
वसुंधरा ही हर्षली
सानथोर सुखावले
आनंदला बळीराजा
चराचर समृद्धले
लतावेली बहरल्या
जाई जुई शुभ्र फुले
गुलाबाचे ताटवे ही
जागोजागी गंधाळले
पावसाच्या सरींसवे
उनाडला गंध सारा
भक्तिभाव जागवीत
येई सुगंधित वारा
मखमली हिरवाई
शोभे सावळ्या भूवरी
भासे आता ही धरणी
सौंदर्याची खाण खरी
रसिका राजीव हिंगे
