મીઠી મધુર યાદ
*મીઠી મધુર યાદ*
એક એવી યાદ જે લગભગ દરેકને યાદ જ હશે , એવી *મીઠી મધુર યાદ* જેને યાદ કરતાં હૈયુ પુલકિત થઈ જતુ હશે અને *બાળપણ બાળપણ* ફરી રમવાનું મન અવશ્ય થતુ જ હશે અને એટલે જ આજે *નિયતી* આપની સમક્ષ એના બાળપણની મીઠી યાદને લઈને આવી છે . તો ચાલો મિત્રો એ બાળપણની મીઠી યાદને વાગોળતાં આપણે આપણાં જ બાળપણમાં લટાર મારી આવીએ.
*ચાલોને આપણે મીઠી યાદોને વાગોળી લઈએ.*
એ બાળપણમાં ઢીંગલા ઢીંગલીની રમત કેવાં રમતાં હતાં !
ફરી પાછાં સંતાકૂકડીની રમતમાં ચાલને છુપાઈ જઈએ,
*ચાલોને આપણે જૂની યાદોને વાગોળી લઈએ.*
એ શાળાનાં દરવાજે જીરાગોળી અને શરબત કેવાં પીતા હતાં!
ફરી પાછાં ટહેલતાં ટહેલતાં સાંજે ઘેર જઈએ,
*ચાલોને આપણે જૂની યાદોને વાગોળી લઈએ.*
એ પેન્સિલનાં છોતરામાંથી રબર બનાવવાની ખોટી મહેનત કરતાં હતાં!
ફરી પાછાં કટાયેલી જિંદગીની ધાર કાઢી લઈએ,
*ચાલોને આપણે જૂની યાદોને વાગોળી લઈએ.*
એ પોળમાં ભરાતાં મેળાની મજા કેવી માણતાં હતાં!
ફરી પાછાં ચાંદા પર બેસીને ફોટો પડાવી લઈએ,
*ચાલોને આપણે જૂની યાદોને વાગોળી લઈએ*
એ કપાયેલા પતંગની પાછળ કેવાં ગાંડા થતાં હતાં!
ફરી પાછાં માયાજાળથી મુક્ત થઈને નભમાં વિહરી લઈએ,
*ચાલોને આપણે જૂની યાદોને વાગોળી લઈએ*
એ ભેગા બેસી ગૌરીવ્રતમાં કેવાં મોળુ ખાતાં હતાં!
ફરી પાછાં જાગરણમાં માળો માથે લઈએ,
*ચાલોને આપણે જૂની યાદોને વાગોળી લઈએ*
એ શાળાની રીસેસમાં લંચબોકસની મજા કેવી લેતાં હતાં!
ફરી પાછાં લાગણીઓના ભાગ ભરી લઈએ,
*ચાલોને આપણે જૂની યાદોને વાગોળી લઈએ*
એ વાતવાતમાં રીસાઈને કીટ્ટા કેવાં કરતાં હતાં!
ફરી પાછાં ૨ આંગળી બતાવી બુચ્ચા કરી લઈએ,
*ચાલોને આપણે જૂની યાદોને વાગોળી લઈએ*
એ પાંચ પૈસા બચાવવા શાળામાં ચાલતા જાતાં હતાં!
ફરી પાછાં ગળે મળીને મનનાં તાર ઝણઝણાવી લઈએ,
*ચાલોને આપણે જૂની યાદોને વાગોળી લઈએ*
એ સાથે બેસી શાળાનું ઘરકામ કેવાં કરતાં હતાં!
ફરી પાછાં જીવનબુકમાં છાપ છોડી જઈએ,
*ચાલોને આપણે જૂની યાદોને વાગોળી લઈએ*
એ મોબાઈલ વગરનાં જીવનમાં પણ કેવાં આપણે ખુશ હતાં!
ફરી પાછાં બાકસનાં ટેલીફોન પર વાત કરી લઈએ,
*ચાલોને આપણે જૂની યાદોને વાગોળી લઈએ*
એ ફટાકડા ફોડયા પછી ન ફુટેલા ફટાકડા કેવાં આપણે શોધતા હતાં!
ફરી પાછાં નવાવર્ષનાં સાલમુબારક ભેટીને કરી લઈએ,
*ચાલોને પાછી જૂની યાદોને વાગોળી લઈએ*
એ નાના અમથા ઘરમાં પણ કેવાં આપણે સુખી હતાં!
ફરી પાછાં નાના બનીને *બાળપણ બાળપણ* રમીએ,
*ચાલોને આપણે જૂની યાદોને વાગોળી લઈએ*
ખરેખર મિત્રો આપણે ગમે એટલા મોટાં થઈ જશુ, પણ આપણું બાળપણ ક્યારેય ભુલાશે નહીં. એ ભાઈબંધ સાથે કરેલી ધીંગામસ્તી આપણે ક્યારેય ભુલી નહીં શકીએ.
જીજ્ઞા કપુરિયા 'નિયતી'
