पूर्तता
पूर्तता
मनी आस पूर्तीची साक्षीस ठेव काळा
मागे वळून आता लावू नकोस डोळा ।। धृ. ।।
माझ्या मनास वाटे सत्यासी भुलवावे
स्वप्नात येउनीया अंकी तुझ्या स्थिरावे ।
विसरु कसा गं हळुवार स्पर्श भोळा
मागे वळून आता लावू नकोस डोळा ।। १ ।।
म्हणसी मला गडे तू स्वप्नात येऊ का
तेथे तरी मला तू सहवास देसी का ।
भिडलाच ना मनी भरला तुझा गळा
मागे वळून आता लावू नकोस डोळा ।। २ ।।
उगमातला प्रपात धुंद यौवनाचा
शांतून तन प्रवाही ध्यास मीलनाचा ।
आनंद अर्पणात की सूख जन्मकळा
मागे वळून आता लावू नकोस डोळा ।। ३ ।।
जन्मास पुष्प यावे देवा पदी पडावे
वा कृष्णकुंतलांस गुंतून गंधवावे ।
आशा उरी बळावे देण्यास परिमळा
मागे वळून आता लावू नकोस डोळा ।। ४ ।।
©️ भालचंद्र (मिलिंद) चितळे
