बाळकृष्णाची पाउले
*बाळकृष्णाची पाउले*
खेळ खेळता शोधित आई भिरभिर डोळे इवले ।
दुडूदुडू धावे बाळकृष्ण तो उमटवीत पाउले ।। ध्रु. ।।
वसुदेवाचे भाग्य उदेले कृष्ण जन्मला कुळामधे ।
ईश्वरांश निवडोनि देवकीस पू्र्वपुण्यप्रारब्धे ।।
मूल आठवे कंसा वधण्या कारागृही प्रकटविले ।
दुडूदुडू धावे बाळकृष्ण तो उमटवीत पाउले ।। १ ।।
उग्रसेन महाराज बंदी कंस मातला मथुरेत ।
त्याच्या असुरी सत्तेपुढती सर्व रयत भयभीत ।।
भीतीमुक्त करण्या गोऽधनास कंस चाणूर वधिले ।
दुडूदुडू धावे बाळकृष्ण तो उमटवीत पाउले ।। २ ।।
लोणी चोरण्या फोडीत मडकी अवखळ कान्हा द्वाड ।
तरीही गोपिका गोकुळी करिती प्रेमभराने लाड ।।
राधा विहरत कालिंदी तटी श्रीरंगास भुलविले ।
दुडूदुडू धावे बाळकृष्ण तो उमटवीत पाउले ।। ३ ।।
दुधात असते लोणी तसेच फळ कर्मांत लपले ।
कर्मयोग ही ईश्वरपूजा अंतरी विचार भिनले ।।
नित्य जीवनी रत निष्काम तत्त्वचि मनी जे ठसले ।
दुडूदुडू धावे बाळकृष्ण तो उमटवीत पाउले ।। ४ ।।
पाच पांडव आणि द्रौपदी उद्धरिले अनुसंधाने ।
भूत माहिती जाणी भविष्या वागे संयमी वर्तमाने ।।
युद्धभूमीवर धनंजयाला गुह्य ज्ञान ऐकविले ।
दुडूदुडू धावे बाळकृष्ण तो उमटवीत पाउले ।। ५ ।।
भालचंद्र चितळे (मिलिंद)
९८७०४१४०३१
