निसर्ग काव्य

विषय---- श्रावणांत घननिळा बरसला

श्रावणांत घननिळा बरसला

        रिमझिम  झरती  धारा

            आसमंती चैतन्य पसरले

              चिंब चिंब भिजली धरा

पानापानातून जलमोती

    ऊन कवडसे संगती

      इंद्रधनु सप्तरंगी झुला

           झुले अवनीवरती

सुवर्ण  मुकुट डोंगर माथी

      हिरवी मखमाली  धरेवर

         तृणपाती लवलवती सुंदर

             फुलपाखरू भिरभिरे त्यावर

पिवळासाज डोंगरमाथी

   जलप्रपात खळाळती कपारी

        दुग्ध धवल जलधारांचे

             रम्य  नर्तन  चाले त्यावरी

रम्य ताटवे फुलाफुलांचे

     परिमळ पसरे चोहीकडे

        भ्रमरांचा मधु गुंजारव  

            पक्षी विहार इकडे तिकडे

मंदिरी किणकिणे घंटा

     धूपाचा मस्त सुगंध

         घननिळ्या श्रावणी

             दरवळ  तो  धुंदगंध.

चैतन्याचे वारे सैरवैर

   गंध सुगंध स्वार त्यावर

       वसुंधरेचे हिरवे लेणे

            हे तर श्रावणाचे देणे.

सौ.मंजिरी अनसिंगकर नागपूर

       ‌‌