बुवाबाजी डॉट कॉम
*बुवाबाजी डॉट कॉम !*
गावगावी पसरले महाराजायचे जाळे !
संतायच्या नावे करती धंदे भोंदु काळे!
लोकायच्या श्रद्धेचा फायदा पुरा घेती
सोताले गजानन साई म्हनुन घेती !
भाविकायच्या खिशाले कैचि लावती हळुच !
भक्तायले बाबा लुटती गोड गोड बोलुन !
उपजिविकेचं काही साधन नाही त्यायले !
तरि बाबा चढवतेतं मजल्यावर मजले !
गल्लोगल्ली थाटले दिसती महाराजायचे दुकान !
महाराजायच्या प्रस्थाविना दिसे नाही मकान !
भांडवल नाइ शिक्षन नाइ मेहनत नाइ लागत !
माल देती पाया पडती बाया बापड्या भगत !
आयकर ना विक्रीकर ना कोंता कर लागत !
मंत्री संत्री दरबारात येती जोडे घासत !
ह्याच धंदा दिसते मले मस्त आनं स्वस्त !
सुरु करा जोरात टाकुन माह्यावरी भिस्त !
धंद्याच्या या सल्यासाठी मले येउन भेटा
' बुवाबाजी डॉट कॉम 'च्या पत्यावरी खेटा !
कवी -- अनिल शेंडे.
