विमान
(३) विमान
आई, मला नक्को हे खेळण्यातलं विमान
खर्ऱ्या खुर्ऱ्या विमानात बसेल म्हणतो छान ||धृ.||
वैमानिक काकांशी मी, लाडीगोडी लावेन
विमानात काॅकपिटमध्ये, जाऊन बसेन
मित्रांना सांगेन ऐटीत, वाढेल माझी शान ||१||
हवाई सुंदऱ्यांना करेन, मी थोडीशी मदत
विमानात चालून चालून, असतील त्या दमत
जमिनीवर चालतांना त्यांना, येतो का गं ताण? ||२||
जमिनीवरील पाहीन मी, दिवे लुकलुकणारे
आकाशातील दिसतील जवळून, तारे चमचमणारे
काय पाहू, किती पाहू, हरपेल माझं भान ||३||
घाबरू नकोस बिलकुल आई, मी लवकरच येईन
तुझ्यासाठी खूप खूप खाऊ, आणि खेळणी आणीन
मात्र तुझ्या कुशीतच झोपेन, मी होऊन लहान ||४||
भारती महाजन-रायबागकर
चेन्नई
9763204334