नामस्मरण
।। श्री राम समर्थ ।।
सद्गुरू कृपेने नामस्मरण करत असतां वेळोवेळी झालेल्या " जाणिवा "
।। श्री राम ।।
चुकांचे डोंगर पापांच्या राशी ।
तरी वांछितेस ग मुक्ती कशी ।।
नव्हे सुटका भोगल्या विणा ।
परी राम समर्थ आहे जाणा ।।
चुकांचे डोंगर पापांच्या राशी ।
जरी आहेत पाठीशी ।।
परी देऊनी अनुग्रहे सद्गुरू ।
मज लाविले नामस्मरणाशी ।।
चुकांचे डोंगर पापांच्या राशी ।
समर्पुनी सर्व गुरू चरणांशी ।।
आता स्वतंत्र, मुक्त, निश्चयी ।
होण्यास लीन सद्गुरू चरणी।।
सोबत आहे सद्गुरूंची ।
नव्हे चिंता आता कशाची।।
देऊनी रामनाम मुखी ।
ठेविले सद्गुरू आम्हां सुखी ।।
घेऊनी कर्माचा ढिगारा ।
परतोनी जन्मासी आला ।।
आणि म्हणे देवाला ।
सुख हवे मला ।।
ना मनाची स्थिरता ।
ना बुद्धीची एकाग्रता ।
ना चित्त सोडे चंचलता ।
ना वृत्ती सोडे विकलता ।
ना सद्गुरू चरणी लीनता ।
ना रामनामी तल्लीनता ।
मग कशी मागतेस "मुक्तता"।।
देहबुद्धीत जगणारा "जीव"।
आत्मबुद्धीत जगणारा"शिव"।।
आत्मबुद्धीत स्थिरावणारा"सदाशिव"।
आत्मबुद्धीतच रमणारा "राम"।
जो देतो सर्वांना "पूर्ण विराम"।।
