અરે! આપવું જ હોય તો!
અરે! આપવું જ હોય તો..
અરે! આપવું જ હોય તો આપ સાવનને,
આમંત્રણ કે, વહેલા પધારવાનું કષ્ટ કર..
અરે! પે'લી ઋતુઓની રાણીને કહીને,
ફક્ત વર્ષાઋતુની જ આજ મહેર કર...
અરે! આ તારા ખુલ્લા ગગનને ઢાંકીને,
કાળી કાળી વાદળીઓની ભરમાર કર..
આ કાળઝાળ ગરમીનો પારો ઘટાડીને,
ઝરમર ઝીણો શ્રાવણીયો વરસાદ કર..
હૈયું ગૂંગળાય છે તારી યાદની લ્હાયમાં,
ટાઢી ટાઢી ઠંડકનો મીઠડો શ્રીકાર કર..
સૂરજની આગથી બળેલી ધરતી ઢાંકવાને,
લીલીછમ લીલોતરીનો જ વરસાદ કર..
ભીંજેલ ધરતીની ફોરતી મહેંક માણવાને
સહુથી પે'લા બસ તું કાંતમાં એકાંત કર..
કવિ શ્રી એકાંત..
જયંતિલાલ વાઘેલા (એકાંત)
