ક્યારેક...
ક્યારેક ખુદના જ પ્રખર તાપમાં સૂરજ તરફડતો રહે છે,
ને ઉછીના અજવાશમાં પ્રકાશતો ચંદ્ર અમસ્તું જ ગુમાન કરી જતો હોય છે;
ક્યારેક લોહીના સંબંધોમાં જ લોહી રેડાઈ જતું હોય છે,
ને નિસ્વાર્થ સંબંધોમાં પણ ઝીણા અક્ષરે 'શરતો લાગુ' વંચાઈ જતું હોય છે;
ક્યારેક ચમકીલી પારદર્શક સવાર આંખોને ધુમ્મીલ કરી દેતી હોય છે,
ને ઓશિયાળી અને બોઝિલ સાંજ મનને પ્રસન્ન કરી જતી હોય છે;
ક્યારેક માનવ મહેરામણથી દૂર મન શાંતિના સાંનિધ્ય માટે તરસતું હોય છે,
ને મનગમતા એકાંતમાં ખુદની સાથે જ બાખડી પડાતું હોય છે...