હું તને શોધું છું...

રાતનો અંધકાર તો અપેક્ષિત જ હોય છે,

પણ દિવસના ઉજાસને પણ અકબંધ રાખે એવા

એ સૂર્ય...

હું તને શોધું છું;

સાચા ગુરુઓ તો આજે પણ ઘણા મળી આવશે આ સંસારમાં,

પણ એકલવ્યની જેમ અંગુઠો કાપીને દક્ષિણામાં આપી દે એવા

હે શિષ્ય ....

હું તને શોધું છું;

આયના તો અઢળક મળે છે આ બજારમાં,

પણ પોતાના અંતરાત્મામાં ડોકિયું કરાવી શકે એવા

એ દર્પણ,

હું તને શોધું છું;

માન્યું કે ગ્લોબલ વોર્મિંગથી ત્રસ્ત છે આખી દુનિયા આજે,

પણ થીજી ગયેલી લાગણીઓને પણ પીગળાવી નાખે એવી

એ હૂંફ ...

હું તને શોધું છું;

ઊંઘમાંથી ઉઠાડનાર તો ઘણા મળ્યા છે આ જીવનમાં,

પણ આત્માને ઢંઢોળીને જગાડનાર

એ દોસ્ત..

હું તને શોધું છું;

દુન્યવી માયાજાળથી ત્રાસીને ભગવા ધારણ કરતાં સાધુ તો ઘણા જોયા છે,

પણ સંસારમાં જ રહીને પણ સાવ અલિપ્ત રહેતા

એ અલગારી...

હું તને શોધું છું;

મંદિરો અને શિવાલયો તો શહેરની હર એક ગલીઓમાં જોવા મળશે 'રૂપ' તને, 

પણ આંખો બંધ કરું અને દર્શન દઈ દે, એવા

હે ઈશ્વર.....

હું તને શોધું છું.