દિવાળી આવી..નવો ઉમંગ લાવી..
ઘરઘરમાં દિપજ્યોત જલાવો,
માંહ્યલો અંધકાર દૂર ભગાવો,
અંતરના ઓરડે સ્નેહ ફેલાવો,
હૈયે હરખના તોરણ બંધાવો..!
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
હૃદયના દ્વારે દિપક પ્રગટાવો,
આલિંગનથી ઉમંગને વધાવો,
પ્રેમના મારગે ફૂલડાં પધરાવો,
અંધારે આશાનો પ્રકાશ ફેલાવો,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
રંગેબેરંગી રંગોળીઓ પુરાવો,
લબક જબક લાઈટ લગાવો,
મીઠાઈઓના પાકીટ વહેંચાવો,
અમીર ગરીબનો ભેદ ભુલાવો,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
નિતનવા આજ વસ્ત્રો પહેરાવો,
પ્રત્યેક હૈયામાં ખુશીઓ ફેલાવો,
સર્વજન સુખાય મંત્ર અપનાવો,
સ્વાર્થીપણાને આગમાં જલાવો,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
દિવડે દિવડે પ્રગટી છે દિવાળી,
અયોધ્યામાં દીપી ઉઠી દિવાળી,
ફટાકડાના નીનાદે હસે દિવાળી,
પુરા દેશનો ઉત્સવ છે દિવાળી,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
ઇન્ડિયા આજ તો ભારત લાગે,
ભારતમાતા ખુશાલીમાં આજે,
રામધુનનો આજ અલખ જાગે,
દરેકના દિલમાં શ્રીરામ બિરાજે,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
સૌના ઘરમાં લક્ષ્મીના પગરવ થાઓ,
સૌને તંદુરસ્તીને સંગ કલ્યાણ થાઓ,
સૌને સદાયે લાભ-શુભની કામનાઓ,
આ નવલા વર્ષને આજ ઉમંગે વધાવો,
અણગમાને આજ કરી'દો વિદાય,
આ દિવાળી આવી..નવા વર્ષનો ઉમંગ લાવી..!
જયંતિલાલ વાઘેલા (એકાંત)