૮૪. તમે શું ધારો છો
૧
"બા, મોટીબેન સાથે હું હવેલીએ જાઉં ? મારે શ્રીનાથજીનાં દર્શન કરવાં છે."
"ભલે જા."
"બાપા, હું આજે ઉપવાસ કરું ? આજે શિવરાત્રી છે."
"હા, ભલે કર."
"બા, રસૂલ સાથે મસીદમાં જાઉં ? નમાજ કેમ પઢાય એ મારે જોવું છે."
"જા, જોઈ આવ."
"બાપા, મેરીબેન સાથે દેવળમાં જાઉં ? હું પણ પ્રાર્થના કરવાનો."
"ભલે જા, દેવળમાં જઈ આવ."
"બા, મોતીબેન સાથે હું હવેલીએ જાઉં ?"
"આપણે ત્યાં ન જવાય; શિવમંદિરે જા."
"બાપા, હું શિવરાત્રીનો ઉપવાસ કરું ?"
"ના રે, આપણે તે વળી શિવરાત્રી કેવી ? આપણે તો એકાદશી કરાય."
"બા, હું રસૂલ સાથે મસીદમાં જાઉં ?"
"મસીદમા ? મસીદમાં તે જવાય ? તું કાંઈ મુસલમાન છે ?"
"બાપા મેરીબેન સાથે દેવળે જાઉં ? મારે પ્રાર્થના કરવી છે." "મૂરખા ! વિશ્વાસી થઈ ગયો કે શું ? આપણાથી ત્યાં ન જવાય."
