બાળપણ...
બાળપણ
ચાલ ને જિંદગી એક સરળ સોદો કરીએ,
હું આપું આ યુવાની મારી,
તું બાળપણ ફરીથી સોંપી દે..
ઠલાવી દવ જવાબદારી જબરી,
તું તૂટેલા રમકડાં સોંપી દે..
આપું હું મોંઘા ડાટ મોબાઈલ,
તું પેલી દાંડીને પૈડું ફરી સોંપી દે..
નથી ભાવતાં આ પીઝાને બર્ગર મને,
પેલી બટકું એક રોટલીમાં,
ઘી-ગોળ ચોપડી દે..
બહુ ભાર લાગે છે લેપટોપની આ બેગનો,
તું પેલી શાળાનું દફ્તર મને સોંપી દે..
થાક્યો હવે સ્વાર્થ કેરા સંબંધોની દોડમાં,
બાળપણની નિખાલસતા સોંપી દે..
નથી ચઢવું સફળતાનાં શિખરો પર,
પિતાનો એ ખભો મજબૂત સોંપી દે..
નથી ખિલવવું આ પ્રણયનું પુષ્પ મારે,
મારી માતાનો ખોળો મને સોંપી દે..
ચાલ ને જિંદગી એક સરળ સોદો કરીએ,
હું આપું આ યુવાની મારી,
તું બાળપણ ફરીથી સોંપી દે..
-વિજય શિહોરા‘સચેત'
