હિંચકો
હું નાનો હતો ત્યારની વાત છે -
તે દિવસે હું ખૂબ રડેલો
એક હિંચકા કાજે !!
આખ્ખું ઘર માથે લઈ, ધમપછાડા કરી
મેં દાદુ પાસે 'હિંચકો' બંધાવેલો..
આંગણામાં વર્ષો જુનાં એ લીમડાની ડાળે
દાદુએ લાકડાનું પાટીયું ને દોરી લઈ
હિંચકો બાંધી મને બેસાડેલો !
બસ, પછી તો આખ્ખો દિવસ હીંચ્યા કરતો...
સવાર પડતાં જ હિંચકા પર જઈ હીંચ્યા કરવાનું
ને, ઘણીવાર તો મારી સવાર જ હિંચકા પર થતી...
આજે એ હિંચકો શોધવા આવ્યો છું,
મારા હીંચતા સ્મરણોને વાગોળવા આવ્યો છું,
હિંચકા પરથી ઉગતી સવાર ને આથમતી રાત જોવા આવ્યો છું...
પણ, હિંચકાને'ય કોક લઈ ગયું છે
મારા દાદુની સાથે સાથે....