મેઘરાજાની ઉજાણી
(બાળગીત)
-હરિ પટેલ
ધરતી માથે મીઠા જળની લ્હાણી !
મેઘરાજાએ કરી ઉજાણી !
વીજળીબેન તો
ઝળહળ નાચે !
વાદળાં મહીં
શા વાજાં વાગે !
જ્યાં જુઓ ત્યાં પાણી ! પાણી !
મેઘરાજાએ કરી ઉજાણી !
શીતળ સૂ... સૂ...
વાયરા વાય,
ગમાણે બેઠી
ભાંભરે ગાય;
ચકલી ને ખિસકોલી માળિયે ભરાણી !
મેઘરાજાએ કરી ઉજાણી !
મોરલા થનથન
નાચે જોને !
દેડકાં છાતી
કાઢે શોરે !
શોર ને કલશોરની ગુંજી બધે વાણી !
મેઘરાજાએ કરી ઉજાણી !
નાનાં-નાનાં છોરાં
ઘરને નેવે ન્હાય,
કરે કૂદંકૂદા ને
વર્ષાગીતો ગાય;
કાગળની હોડીઓ કૈ’ ડૂબી ને કૈ’ તણાણી !
મેઘરાજાએ કરી ઉજાણી !
વાડીભૈ’ વાડીએ ચાલ્યા
ધોરિયા કેરી જોડ લઇ,
હસુબે’નનું હૈયું હરખે:
હળોતરાનું ટાણું જોઇ !
સુવાસ મીઠી કંસારની ફળિયામાં ફેલાણી !
મેઘરાજાએ કરી ઉજાણી !
***
© Hari Patel
58, Balaji Green Garden City,
Talod, Sabarkantha -383215
Mo. 9998237934