પાવન તીર્થ
શીર્ષક :- પાવન તીર્થ
છંદ :- (લગાગાગા× લગાગાગા×લગાગાગા× લગાગાગા)
તને મારો, મને તારો સહારો છે તો જીવન છે.
ભજું દિલથી તને માધવ, જો તું છે તો આ ઉપવન છે.
મધુર સૂરો મને ખેંચે, બધાં કાર્યો વિસારીને,
ખુલા ચરણે હું દોડું છું, જો તું છે તો આ મધુવન છે.
મહીડાં વેચવા હાલી, ન માખણ ચોરનારો છે.
ન કંકર મારનારો છે, સજળ મારાં આ ચિતવન છે.
ગલીઓ કુંજની ખાલી, વિલખતાં ગોપ નર-નારી,
છલકતી આંખમાં યમુના,
વિરહથી ગ્રસ્ત યૌવન છે.
ન છૂટે મોહ તારો કે ન છૂટે ગામ ગોકુળિયું,
તને હું 'નીલ' સમજાવું, તિરથ આ બહુ જ પાવન છે.
© નૂતન તુષાર કોઠારી 'નીલ'
- વાપી
