રાધા - કિશન
ભીતર બધાનાં આજ તો હરખાય છે રાધા-કિશન,
સૌના નયનમાં આંસુ થઇ છલકાય છે રાધા-કિશન.
મન ને હૃદય બંને તમે કોમળ જરા રાખી જુઓ;
આવી ઘણીયે વાતમાં સમજાય છે રાધા-કિશન.
વૃક્ષો, નદી, ઝરણાં, પહાડો લાગતાં સુંદર મને;
સૌમાં વસીને કેટલાં મલકાય છે રાધા-કિશન.
કરવી છે વાતો પ્રેમની આજે એકાંતમાં,
ને એટલે આજે ઘણાં શરમાય છે રાધા-કિશન.
રમવાને કાયમ રાસ-ગરબા પ્રેમથી સંગાથમાં,
તેથી જ તો શેરીમાં પણ અથડાય છે રાધા-કિશન.
-ઉમેશ તામસે 'ધબકાર',
વ્યારા (તાપી)
