ચોમાસું વહી જાય મારું કોરું કોરું
(કવિતા)
- હરિ પટેલ
હું તો છબીલા શ્યામને તે ખોળું,
ચોમાસું વહી જાય મારું કોરું કોરું !
વેરણ થઇ છે વીજળી, ડરાવે દિલને;
એકલતાનું ચીરાય હૈયું ભોળું ભોળું !
ચોમાસું વહી જાય મારું કોરું કોરું !
કાટકે શું ફાટશે પડદા તે કાનના ?
ખોસવાને પૂમડાં કાને હું ખોળું !
ચોમાસું વહી જાય મારું કોરું કોરું !
ચડી તોફાને ઓતરાતી આંધીઓ;
ધસમસતું આવે વાદળાંનું ટોળું !
ચોમાસું વહી જાય મારું કોરું કોરું !
અરે ! કોઇ સંદેશો પુગાડો શ્યામને-
વિરહના દર્દ શું આ એકેક ફોરું !
ચોમાસું વહી જાય મારું કોરું કોરું !
નિર્લજ્જ ગલીઓ ભીંજાતી મસ્તીએ !
હુંયે ભીંજાવાને સાથ તારો ખોળું,
ચોમાસું વહી જાય મારું કોરું કોરું !
શ્યામ, આવો ઉતાવળા, થાય ના મોડું !
ચોમાસું વહી જાય મારું કોરું કોરું !
***
© Hari Patel
58, Balaji Green Garden City,
Talod, Sabarkantha -383215
Mo. 9998237934
