આગમન
(કવિતા)
- હરિ પટેલ
આજ કોનું આગમન થયું છે એવું ખાસ ?
વરસે મુશળધાર મેહુલિયો ઠેરઠેર ચોપાસ !
કોણ ધબકી રહ્યું આવીને મારી પાસ ?
મેઘગર્જન કરે મારી છાતીમાંના શ્વાસ !
કાળાંડિબાંગ આભલામાં દમકે છે વીજ,
ઉરને અંબરે ઘેરાય અષાઢી રે બીજ !
શ્રાવણિયો છલકાયો શિવમંદિરને દ્વાર !
નેણોમાં છલકે હેલી નેહની અપાર !
ભાદ્રપદની ઝરમર ધારે ગુંજન કોનું થાતું ?
ગુલાબની કોમળ કળીએ ભ્રમર કરતો વાતું !
આસોની મંડળી ઊમટી,મેઘ ચડ્યો તોફાને !
ઘરને મોભે મોરલો ટહુક્યો તાતાથૈયા તાલે !
વન-ઉપવન નર્તન કરે, ઝરણાં ગીતો ગાતાં,
સપ્તરંગી મેઘધનુષો હૈયા ભીતર રચાતાં !
ખેતર વચ્ચે ચાડિયો ઊભો તાકે કેમ આજે ?
વગડો લીલાં વસન પ્હેરી સજ્જ કોની કાજે ?
સરિતા-સરવર ને નાળાં જળે જાયે છલકાતાં !
કોણ ચીતરાય ભીતર મારે ઝીણેરું મલકાતાં ?
અધરે કોણ ધરી રહ્યું રસીલા મદહોશ જામ ?
ખોવાતી ગઇ હું ને ખોવાતું જાય ગામ !
એકાંત તૂટ્યું ઓરડાનું: કોણે ભીડ્યાં દ્વાર ?
અંગે અંગ ભીંજાતું મારું, રૂદિયું કરે સવાલ !
***
© Hari Patel
58, Balaji Green Garden City,
Talod, Sabarkantha -383215
Mo. 9998237934