શિયાળાની ઠંડી સવારમાં બાલ્કનીમાં બેસી ,સૂર્યના પ્રકાશની કુમાશને અનુભવતાં, ચાની ગરમીનો સ્વાદ માણતાં બંને પતિપત્નીની નજર બાજુના ઘરની બખોલમાં એક ચકલીનાં માળા પર પડે છે. ચકલી થોડાં દિવસો પહેલાં જ જન્મેલાં પોતાનાં બચ્ચાં સાથે ગેલ કરી રહી હતી. ચીં ચીં ચીં નો મધુર કલબલાટ કાનને જેટલો આહલાદક લાગ્યો એટલો જ દિલમાં દર્દની ટિશ આપી ગયો.એક નિસાસા સાથે.....

​​વિશ્વા:  આ ભગવાન પણ કેવા રીસાયા છે.... લગ્ન ના પાંચ વર્ષ પછી પણ આ ખોળો ખાલી છે. નાની સી ચકલીને પણ માતા બનવાનું સુખ છે, તો મને કેમ નહિ? આ મન હવે તો બાળક માટે ઝૂરે છે.

વિરલ: આટલું તડપે છે તો તારી શ્રધ્ધા સાથે ટેકનોલોજીનો પણ સહારો લઈએ તો શું ખોટું છે? આઈવીએફ માટે કેમ નથી માનતી?

 વિશ્વા: ડર.... વિપ્પુ.... ડર.... ક્યાંક આશાનો દુઃખદ અંત ન આવે? મારી શ્રદ્ધા મને જીવવાનુ બળ પૂરું પાડશે અને તારી ટેકનોલોજી કદાચ મને મરી મરીને જીવવા મજબુર કરશે. મન નકારાત્મકતાથી ઘેરાયું છે. કોઈ નિર્ણય લઈ શકું એવી મારી મનોસ્થિતિ છે જ નહિ.

વિરલ: વધુ ન વિચાર... શ્રદ્ધા અને ટેકનોલોજીનો સુમેળ સફળતા જ આપશે, બસ એકવાર મારી વાત પર પણ ભરોસો રાખી જો.

વિશ્વા: ઠીક છે જેવી તારી ઈચ્છા.

આઈવીએફ ટ્રીટમેન્ટ........ ખુશીના સમાચાર.

ખુશી, સપનાં અને કાળજી સાથે એક ઈંતજાર... બાળકનાં જન્મ સાથે, માતા-પિતાનાં જન્મનો પણ....

૬ અઠવાડિયા પછી......

વિશ્વા(આંસુ સાથે): વિરલ જોને આ નાનો સો જીવ તોફાન કરી કેટલું દર્દ આપે છે. આ દુનિયામાં આવવાની ના પાડે છે, એને કાયા સ્વરૂપે બહાર નથી આવવું. જોને.... વિરલ અને વિશ્વાના શ્વાસ સમો વિશ્વાસ બસ લાલ રંગમાં જ વહી ગયો?!

વિરલ વિશ્વાને પોતાની બાહોના વિશ્વમાં સમાવી કહે છે.... આ ખાલીપા સાથે જીવન કેવી રીતે વીતશે.....?

વિરલને દુઃખી અને હિંમત હારતો જોઈ બીજી જ ક્ષણે વિશ્વા દુઃખ અને નિરાશાને ખંખેરી વિરલને આશ્વાસન આપે છે.

વિશ્વા: હેય પતિ! આમ કંઈ હાર ના મનાય, આમ જો.... મારા ચહેરા તરફ..... ક્ષણભર નિરાશા આવી અને ચહેરાની સુંદરતા છીનવવાની કોશિશ કરી પણ મેં એને ગેટ આઉટ કહી દીધું.

વિરલ: જૂઠો દિલાસો ના આપ વિશુ, જાણું છું કેટલી ઉદાસ છે તું.

વિશ્વા: તને વિશ્વાસ હતો માનવ સર્જિત ટેકનોલોજી પર અને મને વિશ્વાસ છે માનવના સર્જનહાર પર. તારી આશમાં નિરાશા ભળી છે, મારી શ્રધ્ધા હેમખેમ છે. એનું કંઈ પણ આપવું ન આપવું એમાં આપણી જ ભલાઈ હશે.

વિશ્વાની સમજણ ભરી વાતો સાંભળીને વિરલ તેના કપાળ પર પ્રેમથી ચુંબન કરે છે અને કહે છે, "તું સાચું કહે છે વિશુ... ઉપરવાળો જે કરે છે એ આપણાં સારા માટે જ કરે છે. તારો પ્રેમ અને આ હસતો ચહેરો હશે તો જીવનમાં ક્યારેય કોઈ કમીનો અહેસાસ નહિ થાય.

​CCDD