શણગાર
મન કહે આ મેહુલાને મારી બથમાં ભરી લઉં,
ભીની મહેક માટીની શીશીમાં કેદ કરી લઉં!
મન કહે આ મેહુલાને ....
ટીપે ટીપે ઉઠતા તરંગને કાનકુંડળ કરી લઉં,
કાળી ભમ્મર વાદળીઓને ચોટલે ગુંથી લઉં!
મન કહે આ મેહુલાને ....
ઘનઘોર ઘટાયુ ઘોળીને આંખોમાં આંજી લઉં ,
ઉતારી આભેથી લેરીયું મેઘધનુષી ઓઢી લઉં!
મન કહે આ મેહુલાને ....
તરણે ટપકતાં મોતીની માળા બનાવી લઉં,
ડુંગરે નીતરતા ઝરણાનો કંદોરો બનાવી લઉં!
મન કહે આ મેહુલાને ....
ગરજતી વીજનો રણકાર કડલીએ પુરાવી લઉં,
ઝરમર ઝરતી જળબુંદો ઝાંઝરમાં પરોવી લઉં!
મન કહે આ મેહુલાને ....
આજનાં રે શણગાર સઘળાં મેહથી માંગી લઉં,
ને હેલી પીયુના પ્રેમની મારા હૈયામાં ભરી લઉં!
મન કહે આ મેહુલાને ....