એટલું જ બસ છે
નજરોથી નજરો ટકરાય રોજ.... એમ ક્યાં કહું છું,
દ્રશ્યમાન થાય ચંદ્ર અને થાય અહેસાસ તારી એક નજરનો,
એટલું જ બસ છે.
અધરોથી અધરો સ્પર્શે.... એમ ક્યાં કહું છું,
ચૂમે તું ઉપવનમાં એકાદું ઝાકળ ભીનું પુષ્પ અને થાય અહેસાસ ચુંબનનો,
એટલું જ બસ છે.
સ્પર્શવા છે તારાં કેશ પ્રત્યક્ષ હાથેથી.... એમ ક્યાં કહું છું,
લહેરાય તારી એક લટ હવામાં અને થાય અહેસાસ એને સ્પર્શ્યાનો,
એટલું જ બસ છે.
તારાં સ્નેહમાં ડૂબવા લે તારાં આગોશમાં.... એમ ક્યાં કહું છું,
વેરાય તારું એક નાજુક સ્મિત અને પડે ખંજન તારાં ગાલે ને થાય અહેસાસ તારાં સ્નેહમાં ડૂબ્યાંનો,
એટલું જ બસ છે.
હ્રદય ધબકાર તારો સાંભળવા દેહ મિલન થાય.... એમ ક્યાં કહું છું,
દેખાય એકાદ ટહુકતી કોયલ ઉપવનમાં અને થાય અહેસાસ તારાં હ્રદય ધબકારનો,
એટલું જ બસ છે.
તારાં કંગનનો રણકાર સંભળાવવા તું વીંટળાઈ જા મને થઈ લજામણી વેલ.... એમ ક્યાં કહું છું,
જોઈ રાધા ને કૃષ્ણને સંગ થાય અહેસાસ તારાં કંગન રણક્યાનો,
એટલું જ બસ છે.
તારી પાયલનો ઝણકાર સાંભળવા ચૂમી લઉં તારી પાની.....એમ ક્યાં કહું છું,
સ્પર્શું ઝાલર હવાની અને થાય અહેસાસ તારી પાયલના ઝણકારનો,
એટલું જ બસ છે.
રોજ તારો દિદાર થાય.... એમ ક્યાં કહું છું,
દેખાય કૃષ્ણની આરતી અને થાય અહેસાસ તારાં દિદારનો,
એટલું જ બસ છે.
ગળાડૂબ પ્રેમમાં છે એ જતાવવા રાત હોય રોજ રંગીન.... એમ ક્યાં કહું છું,
પ્રેમ નીતરતી તારી કલમ ચાલે અને થાય અહેસાસ ગળાડૂબ પ્રેમ હોવાનો,
એટલું જ બસ છે.
સ્વીકાર કરવા તારી પ્રીતનો પામું તને.... એમ ક્યાં કહું છું,
ધરી દઉં આરતી દીપ મુજ નીજ હ્રદય મંદિરમાં અને થાય અહેસાસ પ્રીત સ્વીકારનો,
એટલું જ બસ છે.