મદમાતું
નીંભાડે જઈ ખૂબ તપાવ્યું તોય રહ્યું કંઈક કાચું,
ટપ ટપ મારે ટપલી થાય કદી ના પાકું,
મનડું આ મદમાતું ભાઈ મનડું આ મદમાતું.
ઉથલપાથલ ઉથલપાથલ અવળુંને ભાઈ સવળું,
મરકટ સમ દોડે છે પાછું કાયમ આડુંઅવળું,
તા તા થૈ થૈ તાતા થૈ થૈ તાલે એના નાચું,
મનડું આ મદમાતું ભાઈ મનડું આ મદમાતું.
સતની કાંટાળી કેડી પર પામ્યો નહીં પગરખાં,
ચાલ્યો છું પહેરીને જીવનભર જૂઠા સૌ અભરખા,
ડાળે મારી બેઠું કાયમ વૈશાખી ચોમાસું,
મનડું આ મદમાતું ભાઈ મનડું આ મદમાતું.
હસતા ચહેરા પાછળનું દરદ ના કોઈએ જાણ્યું,
પાંપણની પછવાડે સૂતેલું પાણી માંડ અમે તો ખાળ્યું,
કરીને ડોકિયું ભીતર પૂછે પાછા,છો મજામાં..કાકુ!
મનડું આ મદમાતું ભાઈ મનડું આ મદમાતું.
નીંભાડે જઈ ખૂબ તપાવ્યું તોય રહ્યું કંઈક કાચું,
ટપ ટપ મારે ટપલી થાય કદી ના પાકું,
મનડું આ મદમાતું ભાઈ મનડું આ મદમાતું
ડૉ.કિશોર ઠક્કર,ગાંધીધામ.