પ્રશ્ન વલય
પ્રશ્ન-વલય
છે આ જીવન કેવળ પ્રશ્ન? ને એનો ઉત્તર પણ પાછો પ્રશ્ન!
એ ય! બોલ ને તું કેમ ચૂપ છે, પ્રિયે!
ન મનાવ મૌનનો જશ્ન!
મનમર્કટ અટવાય સવાલે પૂછે, હું કોણ? તું કોણ?
કેમ આપણે ભેળાં થયાં ને કેમ રચાયો પ્રણય-કોણ!
ચાલ, આપી જ દઈએ આજે, એક-બીજાને કોલ.
વાંચી શકું છું ભાવો તારાં, તું આંખેથી બોલ!
ફાગણ આવ્યો, પ્રેમ ઋતુ લાવ્યો, ઉરે છાયો વસંત.
પ્રેમ-પ્રસ્તાવ સ્વીકારને મારો, લાવી મૌનનો અંત..
ઋણાનુબંધ છે તારો-મારો, રહ્યો બાકી ગત જન્મ.
તોડને બંધન ક્રૂર રિવાજના, કર કહે જે તારું મન.
તું બોલે ના બોલે, બોલે તારી ધડકન, સુણ.
'નીલ'રંગી આંખોમાં શાને બાઝે ઝાંઝવાની ઝૂલ?
પ્રશ્ન-વલયે અટવાઈ ન ડૂબીશ, મળી જીવને મંઝિલ.
મૂક જરા છૂટું આ મન ને આવ, માણ 'નૂતન' મહેફિલ.
© :- નૂતન તુષાર કોઠારી 'નીલ'
- વાપી
તા.: ૦૯/૦૩/૨૦૨૦
