કીડીબાઇએ કરી કમાલ
(બાળગીત)
- હરિ પટેલ
કીડીબાઇએ કરી કમાલ,
જોવા જેવી થઇ રે;
ઊભી બજારે માંડી ધમાલ,
જોવા જેવી થઇ રે…
જીવાકાકાના જોડામાં ઘૂસી,
ચૂટકી એવી દીધી રે;
જીવાકાકાએ પાડી બૂમો,
ભીડ ભેગી કીધી રે...
જીવાકાકાએ જોડો કાઢી,
સૌની સામે ધર્યો રે:
“જુઓ, ભઇ ! આ જોડામાં,
કો’કે ચૂંટકો ભર્યો રે”...
જોડાને લૈ’ હાથમાં
સૌ કોઇ જુએ રે;
અંદર બેઠાં કીડીબાઇ
ધ્રુસકે ધ્રુસકે રૂએ રે...
કહે લોકો, “ શાને રડો ?
કામ કીધાં ખોટાંજી.”
કીડીબાઇ ક્યે, “ માફ કરો,
સમજણમાં અમે છોટાંજી !”...
જીવાકાકાએ દયા આણી,
સૌને કીધી આજીજી;
“ જાવા દો, કીડીબાઇએ
ભૂલની માફી માંગીજી”...
નીચા મોંઢે કીડીબાઇ
જોડામાંથી નીકળ્યાં રે;
જીવાકાકા તો મૂછમાં હસે,
કીડીબાઇ તો વીલાં રે...
***
© Hari Patel
58, Balaji Green Garden City,
Talod, Sabarkantha -383215
Mo. 9998237934