ન હું તને યાદ કરું છું...!
પૂછે છે એ જુઓ મને કે, હું એને સ્હેજે યાદ કરું છું?
કહ્યું મેં ના રે, બસ ખાલી મારે, શ્વાસે-શ્વાસે તને ભરું છું.
ન હું તને યાદ કરું છું, કે ન તને કદી સ્મરું છું!
તારી યાદનો મારી અંદર, ઉછળે છે એક સમંદર,
તો શું કે આમ તેમ અફળાતી, મઝધારે જઈને તરું છું.
ન હું તને યાદ કરું છું, કે ન તને કદી સ્મરું છું!
દિલની મધ્યે પાડી છીંડું, તારી યાદ બની છે કેન્દ્ર બિંદુ,
તો શું કે દોરી પરિઘ ફરતે, હું ધારોધાર ફરું છું.
ન હું તને યાદ કરું છું, કે ન તને કદી સ્મરું છું!
તારી યાદો મેઘ મલ્હાર, તારી યાદે વસંત બહાર,
તો શું કે તારી વિરહ ખિઝાંએ, સૂકી થૈ ને ખરું છું.
ન હું તને યાદ કરું છું, કે ન તને કદી સ્મરું છું!
જામોકામી સ્મિત ચહેરે, તેજ મઢ્યું મેં હર તસવીરે,
તો શું કે તારી યાદમાં ખારું, આંસુ બની ઝરું છું.
ન હું તને યાદ કરું છું, કે ન તને કદી સ્મરું છું!
તારી યાદ ભળી ગઈ રક્તમાં, ને વહે છે એ નસ-નસમાં,
તો શું કે હું 'મીરાં' તારી 'ઝંખના'નાં, ધીમા ઝેરે મરું છું.
ન હું તને યાદ કરું છું, કે ન તને કદી સ્મરું છું!
જાગૃતિ, 'ઝંખના મીરાં'...