ब्लर्ब, प्रस्तावना, परीक्षण असा माझा प्रवास सुरु झाला आणि त्यानंतर माझ्याकडे पुस्तके येऊ लागली. त्यात प्रस्थापित आणि नवोदित साहित्यिकांच्या साहित्यकृतीचा समावेश आहे. मी पुस्तकांना लिहिलेली प्रस्तावना असो, ब्लर्ब असो की पुस्तकांचे केलेले परीक्षण असो, हा केवळ एक औपचारिकपणा नव्हता, तर मलाही व्यक्तिश: त्यांच्या लेखनात काही वैशिष्ट्य दिसले म्हणून मला लिहावेसे वाटले.
माझ्याकडे आलेल्या वेगवेगळ्या साहित्यप्रकारांमधील पुस्तकांपैकी काही पुस्तकांवर मी लिहिलेले परीक्षण, काही पुस्तकांना मी दिलेली प्रस्तावना तसेच काही पुस्तकांची केलेली पाठराखण(blurb) याचा एक छोटेखानी संग्रह काढावा असे नंतर माझ्या मनात आले. कारण मी निवडलेल्या पुस्तकांमध्ये प्रत्येक लेखकाची/कवीची लेखनशैली, मांडणी, शब्दसौष्ठव, भाषासौंदर्य, रचना या गोष्टींनी माझ्या मनामध्ये घर केले. या सर्वांना एका ठिकाणी आणले पाहिजे असे मला प्रकर्षाने वाटू लागले.
आणि म्हणूनच हा लेखन प्रपंच!
- उद्धव भयवाळ