આપ સૌ સમક્ષ મારું છઠ્ઠું પ્રકાશન મુકતા હું અત્યંત આનંદ અનુભવી રહ્યો છું. લેખન પ્રવૃત્તિ શરૂ કર્યા બાદ આમ હું કરી શકીશ તેનો કોઈ અંદાજ ન હતો પણ આજે તે સાકાર થઇ રહ્યો છે. આ અગાઉ મારા ત્રણ વાર્તાસંગ્રહ ‘ઓળખાણ’ (એપ્રિલ ૨૦૧૭), ‘સ્નેહસંબંધ’ (ડિસેમ્બર ૨૦૧૮) અને ‘શતરંજનું પ્યાદું અને અન્ય રચનાઓ’ (ઓગસ્ટ ૨૦૨૦)માં પ્રકાશિત થયા હતા. ‘સ્નેહસંબંધ’ વાર્તા સંગ્રહને ‘મહારાષ્ટ્ર રાજ્ય ગુજરાતી સાહિત્ય અકાદમી’ તરફથી ૨૦૧૮-૧૯માં પ્રકાશિત વાર્તાસંગ્રહોમાંથી મારા વાર્તાસંગ્રહને ‘રામનારાયણ પાઠક પુરસ્કાર’ (લઘુકથા)નો પ્રથમ પુરસ્કાર પ્રદાન થયો છે. ત્યાર બાદ મેં નવલકથાના ક્ષેત્રમાં પ્રયાસ કરવાનું વિચાર્યું અને મે ૨૦૨૧માં મારી પ્રથમ નવલકથા ‘વિપુલ ઝરણું’ રચાઈ અને તેનું પ્રકાશન થયું. આ નવલકથાને ‘બૃહદ મુંબઈ ગુજરાતી સમાજ’ અને ‘ચિત્રલેખા’ના સંયુક્ત ઉપક્રમે યોજાયેલી નવલકથા સ્પર્ધામાં ત્રીજું ઇનામ પ્રાપ્ત થયું. વિચાર આવ્યો કે મારી જ એક વાર્તા ‘અતિથિ દેવો ભવ’નું હું નવલકથામાં રૂપાંતર કરું. ટેવ મુજબ તે નવલકથા જાન્યુઆરી ૨૦૨૨માં પ્રકાશિત થઇ. ‘અમે બે અને અન્ય રચનાઓ’ આ વાર્તાસંગ્રહ મારી જુદી જુદી પ્રકાશિત રચનાઓનો સંગ્રહ છે. આશા છે તે પણ આપનો આવકાર પ્રાપ્ત કરશે. આ અગાઉ મારી નવલકથા ‘અતિથિ દેવો ભવ’નું શોપિઝન પ્લેટફોર્મ અને પબ્લિકેશન દ્વારા પ્રકાશન થયું હતું અને હવે તેમના દ્વારા આ મારો વાર્તાસંગ્રહ પ્રકાશિત થાય છે તેનો મને આનંદ છે અને તે બદલ હું શ્રી ઉમંગ ચાવડા અને શોપિઝન ટીમનો આભારી છું. મારા સર્વે મિત્રો, સંબંધીઓ અને હિતેચ્છુઓને કેમ ભુલાય? તેમના તરફથી મળતું પ્રોત્સાહન અને સરાહના મને લેખન પ્રવૃત્તિ ચાલુ રાખવા માટે પ્રેરે છે. તે માટે સૌનો હૃદયપૂર્વક આભાર. હવે પછી પણ તે મળતો રહેશે તેવી આશા.
નિરંજન મહેતા
