कवितेच्या या सौंदर्याच्या आणि अलंकारांच्या खुबी उलगडवून दाखवून तिचा सखोल आणि दडलेला देखील भावार्थ रसिकांपर्यंत पोहोचवायचे नाजूक आणि तरीही समर्थ कार्य समीक्षक करतात. बारीक तोंडाच्या कुपीत बंदिस्त अत्तराचा हळुवारपणे रसिकाला सुवास देण्याइतके हे नाजूक काम असते, अत्तर बाहेर तर आले पाहिजे पण सांडता कामा नये.
प्रस्तुत रसगंध या रसग्रहणात्मक पुस्तकात सौ. नीलिमा खरे यांनी हे कार्य विलक्षण ताकदीने करून दाखविले आहे. यासाठी सगळ्या माझ्याच कविता निवडून त्यांनी माझा गौरवच केला आहे हे आवर्जून नमूद करणे हे माझे कर्तव्यच आहे. त्यांनी एकसुरी कविता न निवडता माझ्या विविध विषयांच्या विविध भावनांच्या आणि विविध दृष्टीकोनाच्या कविता निवडल्या आहेत. त्यात देखील काही कविता या माझ्या विविध काव्यसंग्रहातून तिने निवडल्या आहेत तर काही कविता मुद्दाम माझ्या मागे लागून अप्रसिद्ध अशा कविता घेतल्या आहेत. अशा वैविध्यपूर्ण कवितांची रसग्रहणे सर्वसामान्यांना सहज आकलन होतील आणि पचनी पडतील अशा पद्धतीने ती मांडण्याचे अवघड शिवधनुष्य या लेखिकेने लीलया पेलून दाखविले आहे.- डॉ. निशिकान्त श्रोत्री
neelima khare
