સાહિત્યના વિવિધ પ્રકારો જેવા કે લઘુકથા, નવલિકા, હાસ્યકથા, હાસ્યલેખ, નાટક, નિબંધ, કાવ્ય વગેરેમાં લેખન કરવાનું ગમે છે. વિવિધ રચનાઓ ચાંદની, રંગતરંગ, સરવાણી, આરામ, નવનીત-સમર્પણ, અભિષેક, પરબ, જલારામ દીપ, શ્રીરંગ, હસાહસ, સવિતા, મુંબઈ સમાચાર, ટાઇમ્સ ઓફ ઇન્ડિઆ [ગુજરાતી] જેવાં વિવિધ સામયિકોમાં પ્રગટ થઈ છે.
આકાશવાણી આમદાવાદ વડોદરા પરથી અવારનવાર રેડિયો નાટક પ્રસરિત થતાં રહે છે.
Book Summary
મારા હાસ્યલેખોના આ સંગ્રહનું નામ ‘ટાવરે બેઠો મોર’ એ વાસ્તવિક દૃશ્ય પર આધારિત છે. દૃશ્ય ગીર પ્રદેશમાં વનરાજીની વચ્ચે આવેલા તુલસીશ્યામનું છે. આમ તો મોર વૃક્ષ પર બેઠો હોય, પરંતુ આ મોર તો આંબાથી પણ ઊંચા એવા ટાવરની ટોચે બેઠો છે. વળી, ટાવર પર લાઉડસ્પીકર પણ છે. મોર અને આંબો કુદરતનાં પ્રતીક છે તો ટાવર અને લાઉડસ્પીકર ટેકનોલોજીનાં પ્રતીક છે. મોર વૃક્ષના બદલે ટાવર પર બેઠો હોય અને ટાવર પર લાઉડસ્પીકર પણ લાગેલું હોય એ દૃશ્ય જ રમૂજી છે ને? આ દૃશ્ય પરથી વ્યંગથી ભરેલો એવો અર્થ તારવી શકાય કે મોર જેવા પંખીને પણ નવા જમાનાની ટેકનોલોજી સામે વાંધો નથી. બદલાતા જમાના સાથે મોર પણ પોતાની પસંદગીને બદલી શકે છે.
દુનિયા ટાવરે બેઠેલા મોર જેવાં અનેક દૃશ્યોથી ભરેલી છે. અજુગતાં લાગે તો પણ એ સ્વીકારવાં પડે. એ દૃશ્યોમાથી પણ આનંદ મેળવવો પડે. મેં મારા હાસ્યલેખોમાં આવાં કેટલાંક દૃશ્યોની વાત કરી છે. કેટલાંક દૃશ્યો વાસ્તવિક છે તો કેટલાંક કાલ્પનિક છે. એમાં વ્યંગ, કટાક્ષ અને હાસ્યના રંગો પૂરવાનો પ્રયાસ કર્યો છે.
વાચકોને મારો પ્રયાસ ગમશે એવી આશા છે.