Name: #family | Nakul Akanpalliwar
Availability: InStock
Rating: 5
Author: Nakul Akanpalliwar

#family : ती रविवारची प्रसन्न सकाळ होती. शाळेची गडबड घाई नसल्याने सोना व मोना या दोघी बहिणी अगदी निवांत होत्या. खोलीच्या खिडकीत बसून घराभोवतालच्या बागेचे व पक्ष्यांचे निरीक्षण करत होत्या. तेवढ्यात दोघींच्या आईने त्यांना स्वयंपाकघरातून हाक मारली. आईची हाक ऐकून दोघी धावतच स्वयंपाकघरात गेल्या. आई म्हणाली," मुलींनो, हे दूध पिऊन टाका बरं आणि दूध पिऊन झाले की आपल्या बंगल्याभोवतालच्या बागेला पाईपने पाणी घाला आणि या परडीत देवपूजेसाठी थोडी फुले तोडून आणा." बागेला पाणी घालणे आणि पूजेसाठी फुले खुडणे हे दोघींच्या आवडीचे काम असल्याने दोघीजणी दूध पिऊन आईने सांगितलेले काम करण्यासाठी पळाल्या. बागेत येताच दोघीजणी आळीपाळीने बागेतील फुलझाडांना व फळझाडांना पाणी घालू लागल्या. पाणी घालता घालता दोघी बहिणींच्या अखंड गप्पा सुरू होत्या. सर्व बागेला पाणी घालून झाल्यावर व थोडी फुले तोडल्यावर दोघी बहिणींनी परडी घरात नेऊन ठेवली आणि बागेतल्या झोपाळ्यावर मुक्काम ठोकला. पुन्हा दोघी बहिणी गप्पांमध्ये हरवून गेल्या. गप्पांच्या ओघात सोना मोनाला म्हणाली," उद्या पाच जून, ' जागतिक पर्यावरण दिन ' आहे . आमच्या क्लास टीचरने आम्हाला ' प्लास्टिक प्रदूषणाविरुद्ध लढा ' या विषयावर आपले विचार लिहून आणायला सांगितले आहेत. उद्या वर्गात आम्हाला या विषयावर चर्चा करायची आहे." यावर मोना म्हणाली," हो ग ताई, आम्हाला पण याच विषयावर या आठवड्यात निबंध लिहून आणायला सांगितला आहे. आपण दोघी मिळून या विषयावर चर्चा करूयात." दोघी बहिणी या विषयावर चर्चा करायला सुरुवात करणार तेवढ्यात त्यांच्या कानावर हाक आली "अगं, मुलींनो जरा इकडे बघा." अचानक आलेला तो आवाज ऐकून दोघीजणी दचकल्या आणि सभोवती बघू लागल्या. पण कोणीच दिसेना. तेवढ्यात पुन्हा तीच हाक त्यांना ऐकू आली. आवाज म्हणाला," अगं मुलींनो, खाली बघा मी पृथ्वी बोलतेय. प्लास्टिक प्रदूषणासंबंधी तुम्ही जी चर्चा करणार आहात, त्या चर्चेत सहभागी होऊन मलाही माझ्या अंतरीची व्यथा तुम्हाला सांगायची आहे." सोना आणि मोना या दोघींना आश्चर्याचा धक्का बसला. दोघी म्हणाल्या, " पृथ्वीमाते , अगं काय सांगायचे आहे तुला? " पृथ्वी म्हणाली," ऐका तर मग. तुमच्या मानवजातीचा प्लास्टिकच्या वस्तूंचा जो अतिवापर चालू आहे त्यामुळे माझा जीव अतिशय घुसमटत आहे. किती कचरा करता ग तुम्ही माणसं ! या तुमच्या प्लास्टिकच्या हव्यासापायी पर्यावरणाचे अतोनात नुकसान होत आहे . जल, वायू आणि मातीचे प्रदूषण मोठ्या प्रमाणावर होत आहे. " पृथ्वी मातेला मध्येच अडवत सोना म्हणाली, " माते , तू म्हणते ते अगदी खरे आहे. पण प्लास्टिकच्या वस्तू, पिशव्या, बाटल्या, डबे इत्यादी तुलनेने स्वस्त,आकर्षक व सहज उपलब्ध असल्याने त्यांचा मोठ्या प्रमाणावर वापर केला जातो शिवाय प्लास्टिकच्या वस्तू वजनालाही हलक्या असल्याने सहजपणे ने - आण करता येते." यावर पृथ्वी म्हणाली," तुम्ही तुमची सोय बघता पण या गोष्टीचा मला किती त्रास होतो याची तुम्हाला कल्पना नाही. या प्लास्टिक प्रदूषणाने जर अक्राळविक्राळ रूप धारण केले तर तुम्हालाही जगणे मुश्किल होईल. तेव्हा लवकर सजग व्हा हे तुम्हाला मला सांगायचे आहे." यावर मोना म्हणाली," माते , आम्हाला जरा उलगडा करून सांग ना. विज्ञानाच्या पुस्तकात आम्ही प्रदूषणाविषयी वाचले आहे . पण तुझ्या तोंडून खुलासा ऐकायचा आहे." यावर पृथ्वी माता म्हणाली," मुलींनो, प्लास्टिक हे रासायनिक संयुगांपासून बनलेले आहे . प्लास्टिकचे जैवविघटन सहजासहजी होत नाही. यासाठी कित्येक वर्ष लागू शकतात. विघटनानंतर त्यातून उत्सर्जित झालेले विषारी पदार्थ आणि तुकडे जलस्त्रोत आणि माती यांचे प्रदूषण करतात. यामुळे पिण्याच्या पाण्याची गुणवत्ता तसेच मातीची गुणवत्ताही कमी होते. असे पाणी जर वारंवार सेवन केले गेले तर विविध जीवघेणे आजार व रोग उत्पन्न होतात. मातीची गुणवत्ता कमी झाली तर हळूहळू ती जमीन नापीक होते. मातीच्या निकृष्ट दर्जामुळे त्यात अन्नधान्य पिकत नाही. त्यामुळे भविष्यात अन्नधान्याची टंचाई निर्माण होण्याची खूप शक्यता आहे." दोघी बहिणी पृथ्वीचे बोलणे अगदी लक्षपूर्वक ऐकत होत्या. दोघी बहिणी म्हणाल्या," खरंच धरती माते, असा विचारही आम्ही केला नव्हता." पृथ्वी पुढे म्हणाली," प्लास्टिक जर जाळले तर त्यातून विषारी प्राणघातक वायू उत्सर्जित होतात. त्यामुळे श्वसनाचे विविध विकार जडून प्रसंगी मृत्यू होऊ शकतो. हा प्लास्टिकचा भस्मासूर दिवसेंदिवस वाढत आहे. तुम्ही लोकांनी केलेला हा कचरा रस्त्यात कंटेनरच्या आजूबाजूलाही विखुरलेला असतो. अशातच जेव्हा पाऊस सुरू होऊन पूरसदृश्य परिस्थिती निर्माण होते तेव्हा हा सर्व प्लास्टिकचा कचरा पाण्याच्या प्रवाहासोबत नदीत प्रवेश करतो. नदी शेवटी समुद्राला जाऊन मिळते. त्यामुळे हा सर्व कचराही समुद्रात येतो. यामुळे जलप्रदूषण होऊन पाणवनस्पती आणि जलचर यांचे आरोग्य आणि अस्तित्व धोक्यात येते. प्लास्टिकच्या डब्यात जेव्हा अन्नपदार्थ दीर्घकाळ साठवले जातात तेव्हा त्यात प्लास्टिकमधील रसायने हळूहळू विरघळतात. त्यामुळे कर्करोगासारखे भयानक आजार उद्भवतात. तेव्हा मुलींनो, प्लास्टिकच्या अतिवापरामुळे निर्माण होणाऱ्या प्रदूषणाच्या व आरोग्याच्या समस्या लक्षात ठेवा आणि प्लास्टिकचा वापर नियंत्रित करण्यासाठी पावले उचला अशी मी पोटतिडकीने तुम्हाला विनंती करत आहे."

Download our App Now !

Nakul Akanpalliwar

Publish Date : 31 Dec 2024

Like : 0

Reviews : 0

Your cart is empty right now

Download our App Now !

Money back guarantee*

Help & Support (10AM - 7PM)

Safe & Secure Payment

Our Company

Your Account

Store Information

Your cart is empty right now

Download our App Now !

Share with your friends :

Money back guarantee*

Help & Support (10AM - 7PM)

Safe & Secure Payment

Our Company

Your Account